मलेसियामा गैरकानुनी आप्रवासी कामदारहरुको धमाधम पक्राउ

समाचार
शेयर गर्नु होला

 

क्वालालम्पुर — मलेसियाले गैरकानुनी आप्रवासी कामदारहरुको देशव्यापी धरपकड र खोजी अभियान सञ्चालन गर्ने भएको छ । वैधानिक प्रक्रियामा ल्याउन सञ्चालन गरिएको ‘पुन: भर्ना एवं दर्ता कार्यक्रम’ को समयावधि शनिबार सकिएलगत्तै गैरकानुनी कामदारहरुविरुद्ध आइतबारदेखि देशव्यापी धरपकड अभियान सञ्चालन गर्ने जनाएको छ ।

दोषी आप्रवासी कामदार र रोजगारदाता दुवैलाई कडा कारबाही हुने जनाइएको छ । उसले रोजगारदाता र रोजगारीबारे विवरणसहित वैधानिक प्रक्रियामा दर्ता हुन सन् २०१६ फेब्रुअरी १५ देखि भनेको थियो ।
यद्यपि गैरकानुनी कामदार स्वदेश फर्कन भने मलेसियाले आगामी अगस्टसम्मको समयावधि यसअघि नै तोकिसकेको छ । नेपाली दूतावासले पनि गैरकानुनी नेपालीहरुलाई उक्त अवधिभित्रै स्वदेश फिर्न आग्रह गर्दै आएको छ ।
मलेसियाली अध्यागमन विभागले सार्वजनिक गरेको तथ्यांकअनुसार धरपकड अभियान सुरु हुनु अगावै पनि कामदारहरु पक्राउ पर्दै आएका छन् । त्यस्ता कामदारविरुद्ध केही दिनयता भएका कारबाही अभियानमा ३० जनाभन्दा बढी नेपालीसहित आप्रवासी कामदारहरु पक्राउ परिसकेका खबरहरु सार्वजनिक भएका छन् ।
पक्राउ गरिएपछि त्यस्ता गैरकानुनी विदेशी कामदारलाई रहेका सम्बन्धित विदेशी कूटनीतिक नियोगहरुसित सहकार्य गरेर छिट्टै नै उनीहरुका देश फिर्ता पठाउने मलेसियाको तयारी छ । गैरकानुनी नेपाली पक्राउ परेपछि घर फिर्ता पठाउँदा दूतावासले नि:शुल्क यात्रा अनुमतिपत्र उपलब्ध गराउने गरेको छ । तर, घरफिर्ती टिकट भने कामदार स्वयंले व्यवस्था गर्नुपर्नेछ ।


शेयर गर्नु होला

Leave a Reply

Your email address will not be published.