तरकारीमा झन् बढ्यो परनिर्भरता

अर्थ समाचार

काठमाडौँ

देशमा तरकारीप्रतिको परनिर्भरता घट्नुको साटो झन् बढ्न थालेको छ । देशको केन्द्रीय तरकारी बजार कालीमाटी फलफूल तथा तरकारी बजार समितिले सार्वजनिक गरेको तथ्याङ्कानुसार आलुमा थप परनिर्भरता बढेको छ ।

समितिले बिहीबार गरेको सुनुवाइमा आर्थिक वर्ष २०७५÷७६ मा उपत्यकावासीको मागको ४० प्रतिशत मात्रै आलु भारतबाट आयात गरिएकामा चालू आर्थिक वर्षको पहिलो सात महिनामै यसको आयात मागको ६६ प्रतिशत रहेको छ । हरेक तरकारीमा यस्तै परनिर्भरता बढ्ने हो भने भारतले आलुमा पनि कुनै दिन प्रतिबन्ध लगाएको खण्डमा प्याजमा जस्तो नहोला भन्न सकिन्न ।

यस्तै परनिर्भरताको असर अहिले लसुनमा पनि देखिएको छ । चालू आर्थिक वर्षमा कालीमाटी बजारमा ३९ हजार १५३ मेट्रिक टन आलु भित्रिएकामा २६ हजार १५ मेट्रिक टन भारतबाट आयात भएको हो ।

आपूर्ति बढेन

बजारमा तरकारीको माग बर्सेनि बढेको छ तर यो अनुरूप आपूर्ति नहुँदा यसको भाउ पुस महिनासम्म महँगो भएको थियो । अहिले क्रमशः घटेको छ । समितिका उपनिर्देशक विनय श्रेष्ठले हाल दैनिक आठ सय मेट्रिक टनसम्म तरकारी बजारमा भित्रिएको जानकारी दिए ।

चालू आर्थिक वर्षको सात महिनासम्म बजारमा उपत्यकावासीको मागानुसार आपूर्ति नहँुदा भाउ निरन्तर उकालो लागे पनि अब भने सस्तो हुने सङ्केत देखिएको उहाँको दाबी छ । चालू आर्थिक वर्षको पहिलो सात महिनामा बजारमा एक लाख ५२ हजार २६० मेट्रिक टन तरकारी भित्रिएको छ ।

समितिका अनुसार आर्थिक वर्ष २०७४/७५ मा दुई लाख २७ हजार ९५८ मेट्रिक टन तरकारी आपूर्ति भएको थियो भने आर्थिक वर्षमा २०७५÷७६ मा दुई लाख ८५ हजार ८९२ केजी तरकारी बजारमा भित्रिएको थियो । यो तथ्याङ्क हेर्दा तरकारीको आयात २४ प्रतिशतले बढेको देखिन्छ तर यो वर्ष भने चार प्रतिशत मात्रै आपूर्ति बढेकाले भाउमा असर परेको हो । तरकारीको माग प्रत्येक वर्ष १५ देखि २० प्रतिशतले बढेको समितिले जानकारी दिएको छ । मागानुसार आपूर्ति नहँुदा भाउमा असर परेको हो ।

लसुन अझै महँगो हुने

बजारमा केही दिनदेखि लसुनको भाउ आकाशिएको छ । अहिले थोकमा यसको मुल्य प्रतिकेजी ६०० रुपियाँभन्दा बढीमा कारोबार भैरहेको छ। खुद्रा बजारमा पाउ (२००ग्राम)कै १७० देखि १८० रुपियाँमा किनबेच भैरहेको छ । लसुनमा ९५ प्रतिशत माग चीनले धान्दै आएकामा त्यहाँबाट अौन छोडेसँगै भाउ आकाशिएको कालीमाटी समितिले जनाइेको छ । चीनमा कोरोना भाइरसका कारण नेपाल अौने सबै नाका बन्द भएकाले यसको असर लसुनको मूल्यमा परेको छ । गोरखापत्रबाट